Plaid Cymru Arfon Sefyll dros pobl Arfon

AS + AC LLEOL YN ANNOG SIOPWYR I GEFNOGI STRYD FAWR BANGOR.

Mae AS Plaid Cymru dros Arfon Hywel Williams a’r AC Siân Gwenllian yn annog siopwyr i ‘aros yn lleol a chefnogi stryd fawr Bangor’, gan y bydd ar gau i draffig tan y Pasg yn dilyn tân difrifol.

Treuliodd Hywel Williams AS a Siân Gwenllian AC y prynhawn yn ymweld â busnesau yr effeithiwyd arnynt gan roi cyngor ar sut y gall busnesau sy'n gymwys, wneud cais am ryddhad ardrethi, o ystyried yr amgylchiadau digynsail.

Byddant hefyd yn dosbarthu llythyrau i fusnesau yr effeithir arnynt yn nodi sut i gysylltu â’r Swyddfa Brisio (VOA), y swyddfa sy'n gyfrifol am gyfraddau trethi annomestig.

Dywedodd Hywel Williams AS a Siân Gwenllian AC,

‘Fe dreulion ni brynhawn ddoe yn siarad â pherchnogion busnesau ar stryd fawr Bangor, sy’n bryderus, yn ddealladwy, am effaith cau’r ffordd ar fasnach a’r problemau cysylltiedig a ddaw yn sgil hyn.’

‘O’n trafodaethau, rydym yn deall bod rhai manwerthwyr eisoes yn y broses o wneud cais am ryddhad ardrethi drwy’r Swyddfa Brisio (VOA), ac rydym yn annog eraill sy’n ystyried hyn i wneud hynny fel cam cyntaf.’

‘Hoffwn ddiolch i Gyngor Gwynedd am eu hymateb adeiladol ac am gynnig cefnogaeth ychwanegol i fusnesau nad ydynt efallai’n derbyn yr ymateb a ddymunir gan y Swyddfa Brisio.’

‘Mae stryd fawr Bangor yn allweddol wrth ddod â phobl ynghyd, gyda’r arlwy o siopau annibynnol yn gweithredu fel man cyfarfod i ffrindiau a theuluoedd ac yn cefnogi swyddi i bobl leol.’

‘Dyna pam mae’n rhaid i ni i gyd wneud yr hyn a allwn i annog siopwyr i gefnogi’r busnesau annibynnol rydyn ni i gyd yn eu hadnabod ac yn eu gwerthfawrogi.’

‘Rwan yn fwy nag erioed, mae angen ein cefnogaeth ar fanwerthwyr y stryd fawr. Rydym yn annog pobl leol ac ymwelwyr fel ei gilydd i ddod i stryd fawr Bangor, cefnogi masnachwyr lleol a’u helpu drwy’r amser anodd hwn.’